5 نصايح لشعر صحي طول شهر رمضان
كلنا بنستنى شهر رمضان من السنة للسنة عشان لمة العيلة والأوقات الحلوة اللي مش بتتنسي، لكن كمان لازم نهتم بشعرنا طول الشهر على أد ما نقدر لأن قلة شرب المَية ممكن تسبب جفاف الشعر.
وفي المقالة دي هنقولكم شوية نصايح سهلة تساعدكم تظهروا بشعر صحي طول شهر رمضان.
1- شرب الماء والسوائل
في الفترة بين الفطار والسحور، اشربي حوالي 2 لتر مَية وعصاير طبيعية في البيت مفيهاش سكر كتير؛ عشان تعوضي نقص الماء والسوائل خلال فترة الصيام، ممكن تحطي أي نوع فاكهة بتحبيه في المَية زي قطع الفراولة أو الليمون أو أوراق النعناع عشان تحسّن طعمها وتساعدك تشربي كمية أكبر من الماء.
2- عمل ماسكات ترطيب
زي ما بترطبي شعرك داخليًا، لازم تساعدي شعرك بعوامل خارجية تمنعه من الجفاف والتقصف زي ماسكات الترطيب، ممكن تستعيني بالزيوت الطبيعية زي زيت الزيتون وزيت الجوجوبا مع 2 معلقة من الزبادي ووزعيهم بالتساوي على شعرك وسيبيهم حوالي نُص ساعة وبعدين اغسلي شعرك بالشامبو ورطبيه بالبلسم.
3- تناول الفواكه المجففة والمكسرات
الفواكه المجففة والمكسرات بتكون موجودة بوفرة في شهر رمضان، زي المشمش المجفف والزبيب اللي بيكون فيهم كميات وافرة من الزنك وفيتامين أ المفيد لصحة الشعر، كمان المكسرات الغير مملحة بتحتوي على بعض الأحماض الأمينية والأوميجا 3 اللي بتعزز صحة الشعر وبتمنع تساقطه.
4- غسل الشعر بالماء الفاتر
عشان تتجنبي مشاكل الشعر زي الجفاف والتقصف والقشرة، فينصح دايمًا بغسل الشعر بالماء الفاتر وتجنب الماء الساخن، ممكن كمان في الشطفة الأخيرة تستخدمي بالماء البارد لترطيب فروة الرأس لمنع الحكة وظهور القشرة.
5- تسريح الشعر بشكل صحيح
تسريح الشعر من الحاجات اللي ممكن تكون بتضر شعرك من غير ما تحسي، عشان كدة دي شوية نصايح وانتي بتسرحي شعرك:
– سيبي شعرك ينشف قبل التسريح.
– استبدلي الأمشاط البلاستيك الضيقة بالأمشاط الخشبية الواسعة.
– فُكي التشابك من تحت لفوق مش العكس.
– دلّكي فروة راسك يوميًا لتحفيز الدورة الدموية، وممكن تستخدمي فرشاة التدليك الأيونية اللي بتحسن نسيج وملمس الشعر وبتقلل الهيشان، اعرفي عنها أكتر من هنا.
نصايح عامة لشعر صحي في شهر رمضان:
– حاولي تبعدي عن الأكل اللي فيه دهون وزيوت كتير.
– قللي من المشروبات الغازية أو اللي فيها سكريات كتير.
– متنسيش أكل الفواكه والخضروات ودخليها مع وجبة الفطار والسحور.
– اكتفي بأكل الحلويات مرتين بس في الأسبوع.
– ركزي على أكل البروتينات زي اللحوم والبقوليات والبيض.