في عيد الحب ، 7 أفعال يقولك بيها إنه بيحبك من غير ما يقولك “بحبك”

341

أفعال كتير تقدر تعبر عن الحب من غير أي كلام، خصوصًا إن في ناس كتير بتفضَل إنها تعبر عن حبها بالأفعال أكتر من الكلام.

عشان كدة مش ضروري الشخص اللي قدامك يقولك “أنا بحبك” عشان تتأكدي من مشاعره ناحيتك، أكبر مثال على كدة هو أهالينا وأجدادنا اللي برغم قلة كلامهم الرومانسي إلا أن كل أفعالهم بتعبر عن حب كبير أقوى من مجرد كلمة بتتقال. 

زي إن ماما تدوق قهوة بابا الأول عشان تتأكد إنها مظبوطة، وإن جدو يمسح لتيتة النضارة رغم رعشة إيده اللي مش بتُقَف.

وأفعال تانية كتير هنقولك عليها هتأكِدلِك أنه بيحبك أو معجب بيكي زي:

1- بيهتم بتفاصيلك

من أهم العلامات اللي بتفضح الإنسان اللي بيحب هي الاهتمام، هتلاقيه مُهتم بأصغر التفاصيل اللي تخصك بشكل ملحوظ، وإنه برغم انشغاله هتلاقيه حريص إنه يطمن عليكي، زي مثلًا إنه يكلمك وهو مع أصحابه، وفي الحالة دي هو بيوصلك رسالة إنه مهتم بيكي حتى وهو وسط ناس كتير بيحبهم.

2- بيشاركك فرحه وحزنه 

السعادة بتضاعف لما بنشاركها مع ناس بنحبها، عشان كدة الشخص اللي بيحبك فرحته هتكمل لما يحكيلك عن كل تفاصيل حياته سواء ترقية أو أي إنجاز حققه حتى لو كان صغير.

كمان هتلاقيه بيشاركك أوقات حُزنه وحيرته وبياخد رأيك في معظم قراراته.

3- بيدعمك تحققي ذاتك 

الشخص اللي بيحبك بيبقى نفسه يشوفك أنجح واحدة، لإنه بيعتبر نجاحكم شيء واحد، عشان كدة هتلاقيه دايمًا بيشجعك إنك تطوري وتشتغلي على نفسك إنك تكوني أفضل، وهتلاقيه بيساعدك في شغلك وبيشاركك رأيه ودعمه في كل خطوة بتاخديها.

4- بيخطط معاكي لمستقبله

هيكلمك دايمًا عن خططه المستقبلية وأحلامه اللي نفسه يحققها الفترة الجاية، مع الوقت هتلاقي إنك بقيتي جزء من الأحلام دي، زي مثلًا إنه يبتدي يحَوِّش فلوسه أو يستثمرها عشان تكونوا سوا في المستقبل أو تعيشوا حياة أفضل مع بعض.

5- بيحسِن من نفسه عشانك 

مين قال إن التغيير شيء مستحيل؟!

في ناس كتير لما بتحب بتتغيَّر للأحسن، وكمان لما بيتحولوا لأشخاص مسئولة، زي اللي مكانش متعود يصحى بدري ولما اشتغل غَيّر عادته وبقى أول واحد يوصل الشغل، نفس الفكرة في العلاقات لما بيكون في أشخاص مسئولين مننا .. بنتغيّر!

6- بيجيبلك هدايا من غير مناسبة

تقديم الهدايا من أهم لغات الحب ودليل إنك على طول في باله وإنه مهتم يفرحك، خصوصًا لو هدية انتي فعلًا محتاجاها وهتوفر عليكي وقت ومجهود أو بحاجات بسيطة زي وردة أو شيكولاتة انتي بتحبيها.

7- مبينساش أي مناسبة تخُصك

زي انه يفتكر عيد ميلادك، عيد الحب أو عيد جوازكم، تاريخ اليوم اللي عرفتوا فيه بعض.

ناس كتير بتستنى المناسبات دي عشان تشوف مين فاكرها ومين لأ، لو انتي منهم ولقيتيه افتكرها وعمل خطط قبلها عشان يكون موجود معاكي ويفرحك .. دة معناه إنك مش شخص عادي عنده وإنه بيحاول يخلي المناسبات دي ذكرى جميلة تفتكروها بعدين.